Exodus 40

Ukumiswa kweThabanikeli

1Ngakho uJehova wathi kuMosi: 2“Misa ithabanikeli, iThente lokuHlanganela, ngosuku lokuqala lwenyanga yakuqala. 3Beka ibhokisi lobufakazi kulo ube ususitha ibhokisi lesivumelwano ngekhetheni. 4Ngenisa itafula ube usufaka izinto ezibekwa phezu kwayo. Letha-ke uluthi lwesibane ube usuxhuma izibane zalo. 5Beka i-alithare lempepha elenziwe ngegolide phambi kwebhokisi lobufakazi njalo ufake ikhetheni esangweni lethabanikeli.

6“Beka i-alithare lomnikelo woku-tshiswa phambi kwesango lethabanikeli, iThente lokuHlanganela; 7beka umkolo endaweni okuzakuthi ngapha lithente lokuHlanganela kuthi ngale kube li-alithare ube usuthela amanzi kuwo. 8Lungisa iguma eliwugombolozeleyo ubusufaka ikhetheni esangweni leguma.

9“Thatha amafutha okugcobela abantu abakhethiweyo ezikhundleni ugcobe ngawo ithabanikeli lakho konke okukilo, ulahlukanisele kanye lezimpahla zalo, ngalokho lizakuba ngcwele. 10Gcoba-ke i-alithare lomnikelo wokutshiswa lazo zonke izitsha zalo; ubusise i-alithare ukuze libe ngcwelengcwele.

11Gcoba umkolo lenyawo zawo ubusuwubusisa.

12“Letha u-Aroni lamadodana akhe eThenteni lokuHlanganela ubusubagezisa ngamanzi.

13Ubusugqokisa u-Aroni izambatho ezingcwele umgcobe ngamafutha umahlukanisele ukuze angenzele umsebenzi wobuphristi. 14Letha amadodana akhe ube usuwagqokisa amabhatshi.

15Bagcobe labo njengokugcotshwa kukayise ukuze bangenzele umsebenzi wobuphristi. Ukugcotshwa kwabo kubapha isikhundla kuzo zonke izizukulwana ezizayo.” 16UMosi wenza konke njengokulaywa kwakhe nguJehova.

17Lamiswa-ke iThabanikeli ngosuku lwakuqala ngenyanga yokuqala yomnyaka wesibili. 18Kwathi uMosi emisa ithabanikeli, wafaka izisekelo endaweni yazo, wamisa amathala, wafaka imithando wasemisa izinsika.

19Wasesendlala ithente phezu kwethabanikeli wasefaka isembeso phezu kwethente njengokulaywa kwakhe nguJehova.

20Wathatha ubufakazi wabufaka ebhokisini lesivumelwano, wahloma imijabo ebhokisini lesivumelwano wasefaka isihlalo somusa phezu kwalo. 21Yikho wasengenisa ibhokisi ethabanikeleni, waphanyeka ikhetheni lokusitha waligubuzela ibhokisi loBufakazi, njengalokho okwakulaywe nguJehova.

22UMosi wasebeka itafula eThenteni loku-Hlanganela eceleni langenyakatho lethabanikeli ngaphandle kwekhetheni, 23wasebeka isinkwa phezu kwalo phambi kukaJehova.

24Wabeka uluthi lwesibane eThenteni lokuHlanganela lukhangele itafula okucinela eningizimu kwethabanikeli, 25wasemisa izibane phambi kukaJehova, njengokulaywa kwakhe nguJehova.

26UMosi wabeka i-alithare legolide eThenteni lokuHlanganela phambi kwekhetheni,

27wasetshisela impepha phezu kwalo, njengokulaywa kwakhe nguJehova. 28Waselengisa ikhetheni esangweni lethabanikeli.

29Wamisa i-alithare lomnikelo wokutshiswa phansi kwesango lethabanikeli leThente lokuHlanganela, wanikela phezu kwalo iminikelo yokutshiswa leminikelo yezilimo, njengokulaywa kwakhe nguJehova.

30Wasebeka umkolo endaweni lapho okwakusithi ngapha liThente lokuHlanganela kuthi ngale kulialithare wasethela amanzi okugeza kuwo, 31ngakho uMosi lo-Aroni kanye lamadodana akhe bawusebenzisa ukugeza izandla zabo kanye lezinyawo. 32Babegeza ngasosonke isikhathi nxa bengena eThenteni lokuHlanganela loba nxa besiya e-alithareni, njengokulaywa kukaMosi nguJehova.

33Ngakho uMosi walungisa iguma elihonqolozele ithabanikeli le-alithare waselengisa ikhetheni esangweni leguma kwaba yikho ukuqeda kukaMosi umsebenzi.

Inkazimulo kaJehova

34Ngakho iyezi lagubuzela iThente lokuHlanganela, kwathi inkazimulo kaJehova yagcwala ithabanikeli. 35UMosi kenelisanga ukungena eThenteni lokuHlanganela ngenxa yeyezi elalimi phezu kwalo, inkazimulo kaJehova yagcwala ethababanikeleni.

36Kulo lonke uhambo lwama-Israyeli, kwakusithi iyezi lingaphakama lisuka phezu kwethabanikeli, labo baqhubeke; 37kodwa kuthi nxa iyezi lingaphakamanga, labo babengaqhubekeli phambili – kuze kube mhla liphakama. 38Ngakho iyezi likaJehova lalisiba phezu kwethabanikeli emini, kuthi ebusuku kube lomlilo eyezini, bebona bonke abendlu yako-Israyeli ekuhambeni kwabo konke.